...الشوق لهيب
...من غير لسان
!تنطق؟... يزيد
!تكتم؟... يبان
...يصاحبني ع السهد اللعين
و يزيد عذابي عذاب كمان
...أصرخ و أخَبَّط بالإيدين
على كل أبواب الجنان
...حاهرب لفين
...حاهرب منين
و الشوق كما الديب الجعان
تترجى ما تترجى فيه
يتغذى ع الروح و الكيان
ياكل ماضيك... الذكريات
...كل اللي جاي
كل اللي كان
لو رحت حتى لميت طبيب
مالهوش حلول فعلا عشان
عشاق كتير قالوا عليه
الشوق لهيب من غير لسان
يا أميرة الحلم الجميل
يا عشق روحي من زمان
قبل اللقا... قبل الهوى
قبل الأوان بميتين أوان
علشان عينيكي السمر دول
...اللي اتولد فيهم حنان
...خلَّى الطيور تنسج ربيع
من حسنهم ... و الصخر لان
ليل السهاد دايماً يهون
و العمر لاجل عنيكي هان
...و يا شوق يا ظالم يا حريق
أخرس يا ألعن ألعبان
يا معذب القلب البرئ
و مسهره لبعد الأذان
إعمل عمايلك ياللا فيه
إحرق... و ربّي المستعان
شريف ضياء
9 - 12 - 2011
ليست هناك تعليقات:
إرسال تعليق