1
...ليل الخريف مجنون
بيجدِّد الأشجان
كما قطر داير بيجري بخمسميت انسان
و كل واحد حكاية و شاكوش و كام مسمار
...بيدقدقم في نافوخي
بيملوا راسي شرار
...نزلت أول محطة
نزلوا معايا كمان
2
عالقهوة ابليس في مجلس يوعظ السمّار
...عايق في زي الورع
...رايق
في ايده سيجار
بيسد ودنه ف أوقات الآدان بإديه
و ساعتها تقدر تشوف ندمه في نِنّي عنيه
و الحقد قايد في قلبه لحد يوم الدين
...و يعلِّم المريدين
أ ... ب اْلانتحار
3
عصفورتي صبرت لحد ما شابت الجناحات
طارت و قالت
...خلاص"
...كان اللي بينّا
"و مات
طرتي و دخلتي ف قفص وِسْع السبع سموات
عصفورتي صوت الكمنجة ف معزوفات الضَّوْ
"حاولت أوفَّر عليكي دوامات ال " لَّوْ
أو وهم إن الحياة من بكره راح تِحْلَوْ
...حاولت إني أنكرك
لَطَّخْ ضميري العار
حاولت انا اعَطَّشِك يا زهرة الصبّار
...حاولت إني اخْمِدِك
قادت في قلبي النار
...و حاولت إني اجحدك
...و حاولت إني العنك
...و حاولت إني اخنقك
...و حاولت إني اطعنك
...و قصيدتي دي مَدْفَنِك
!حتموتي باستمرار
4
ابليس و إنتي و انا و الليل مالوهش نهار
جمعتنا إيد القدر على قهوة الأقدار
من فوق كراسي الندم و الحسرة و الأحزان
قررنا يوم نجتمع و لافيش ف إيدنا قرار
...بارتيتة و اتْجَمَّعِتْ
!قُمْنا لِعِبنا قمار
......
"أنا حاَفرَّق"
...و قال إبليس بصوت الديب
:كان صوت وقور فعلاً يليق بأديب
اللعب عالأعمار مش المشاريب "
فاهم كلامي؟ اللعب عالأعمار
"ارمي بياضك ياللي مش محتار
فتشت جيبي لقيت فاضل شهور و سنين
...راهنت بيهم عليكي
رجعت و انا خسران
5
كان الوجود عتمة... لا نجمة و لا أقمار
و خَـدَرْ غريب امتلكني ... لا آلام و لا أنوار
و الصمت لحنُه شَرْنَقْ قلبي و كياني
فوق شعرة شايبة مشيت... كان تحت منها جحيم
على كتفي شايل جبال الذنب و الترانيم
نُص الطريق عدّيته بِجْناني
و انا لو رجعت حاعيد أخطائي من تاني
غمضت عيني و أنا أصلاً مانيش شايف
ماشي في درب الحسرة وسط النار
...مجنون كفيف بانطلق
.خايف و مش خايف
...و سابقت ندمي
.وصلنا لآخر المشوار
شريف ضياء
11/10/2010
تحفة تحفة تحفة هي و ماريونيت من اجمل ما قرأت بعمري دايما قصايدك مليانة اسكتشات وصور تخليني وانا بقراها كأني شايفهم قدامي فعلا وسا معة الحوار الداير بين الاطراف انت مبدع مبدع ما شاء الله عليك ليه الحاجات الحلوة دي مانشرتهاش من زمان عشان تمتعنا بيها كل قصيدة او خاطرة بتكتبها رواية كاملة الاركان ربنا يحفظك و يبارك في موهبتك الجميلة
ردحذفNoha Alomrani