جرافيتي

جرافيتي

إياك ترسم على حيطة

أو تلمس أي جدار

مش عايزين لمة و زيطة

واقفين لك هنا زنهار

بنصادر أي بالِـتَّــة

بتقاوم أي خضوع

صرَّح مصدر... كان جِتـَّـه

الرسم ده شئ ممنوع

يا اخوانّا... يا سيدي... يا ستي

و انت يا عم الرسام

ممنوع رسم الجرافيتي

من أصله الرسم حرام

-------------------------------

...أنا باتحداك تمنعني

إني أرفرف و أطير

...راح تقدر تخنق يعني

الحلم ف عقل كبير؟

أنا فكرتي هي حمايتي

من طمس و كبت الذات

أنا كل الأرض بتاعتي

و حدودي و لا السموات

حاول تمنعني حتفشل

مين يقدر يخرس نور؟

أنا فَنّي رسالته حَتِوْصل

و حيعبر أيها سور

إن كان كرباجك حامي

أنا حلمي كما اللبلاب

و ان سَـدًّك عِلي قُدّامي

أنا حارسم فيه ميت باب

ناوي أمارس إبداعي

و حَاوَعّي الناس باللون

ان شالله أرسم بصباعي

ألواني تغَيَّر كون

أنا فاض بي خلاص من كبتك

يسقط قمع السَّجّـان

يسقط ظلمك و رقابتك

و تعيش كل الألوان

شريف ضياء

4-4-2012