باكتب لوحدي
عشان ماكملهاش لوحدي
و انا فيها شئت أبيت لوحدي
في الزحمة بره البيت لوحدي
م الوحدة طقيت انا مليت
و دعايا هو يا رب يا ريت
لا خلقتني و لا فيها انا جيت
الدنيا ياما انا فيها قاسيت
مهما تَبَلَّدت و حسّيت
لوحدي
مخدوع لوحدي
وقت الشبع و الجوع لوحدي
و فهمتوا مافهمتوش لوحدي
كله كلام و فاشوش لوحدي
كله بكش على رسم وشوش
كله بقناع مرسوم منقوش
مهما
عانيت و لا بتْحسّوش
اتأكدوا قوي ما تْشُكّوش
راح اسيبها و انا مطرود منعوش
لوحدي
متهوم لوحدي
بالوحدة انا موصوم لوحدي
قدري اني اعيش في هموم لوحدي
مسكين حزين محروم لوحدي
الوحدة نسر عليا يحوم
قدري المسَطَّر و المقسوم
مين اللي من حقه انه يلوم
مقدرش اقول ان انا مظلوم
بس اللي عارفه حانام و حاقوم
لوحدي
باصحى لوحدي
إكمنّي دايماً نايم لوحدي
ايه يعني لما بانام لوحدي
و تسرسب الأيام لوحدي
ضاع عمري و انا عايش اوهام
في مطاردة لفتاة الأحلام
طلعت كلام في كلام في كلام
مايهمنيش حيصدق كام
من بعد عشق و شوق و غرام
لوحدي
شريف ضياء
18-11-2011
ليست هناك تعليقات:
إرسال تعليق