لما

لما يعبُر حد عشقي ليكي لخطوط النهاية

لما أفديكي بعيوني أو بعمري... مش كفاية

لما ازوق لك طريقك بالورود ... و الشوك نصيبي

و ارضى بالأشواك و ابوسها... كله لاجل عيون حبيبي

لما أبعت بوسة ويّا كل نسمة تزور خدودك

لما اتوه فيكي و لا اعرف فين حدودي و فين حدودك

لما تبقي كل مينا ليها يوم بافرد قلوعي

لما تبقي فجر ضحكة تنهي لياليّا و دموعي

لما باحسد ضي نجمة كل ليلة تزور سماكي

فيكي تتأمل ... تقلد لمحة من طلة بهاكي

لما الاقي كل ذرة من كياني الشوق ماليها

و اكتم النار اللي جوه قلب قلبي و اداري فيها

آه... قدرت أداري شوقي و عشقي من نظرات عيوني

ما تشوفيش إيه اللي فيا ... من نيران ولعي و جنوني

لما ادوب دوبان في حسنك و انتي و لا دارية اللي بيّا

لما تبقي الكون ده كله... تبقي ايه في الكون ده ليّا؟

تبقي ساكنة ف شمس ضحكي... تبقي قمرة ف ليل آهاتي

تبقي ست الحسن عندي ... تبقي روحي و نور حياتي

تبقي عشق العمر ... تبقي آخرة السكة الطويلة

تبقي بكرة الجاي أخضر... ويّا أحلى وعود جميلة

تبقي جوه العين دي نورها... تبقي جوه القلب وردة

تبقي حلم جميل باشوفه كل ليلة عالمخدة

تبقي شمس العمر كله... تبقي بدري اللي ف سمايا

لمااقول إني ف هواكي... بس عاشق... مش كفاية